سیرت نبوي (۱۶۷برخه)
لیکنه: مولوي عنایت الله علمي / تعلیم الاسلام ویب پاڼه
د مشرکانو د لښکر آمادګي او تياري
هلته مشرکانو خپل لښکر د پخوانيو جنګو پر نظام موافق جوړاوه، د لښکر عمومي قومندان ابوسفيان بن صخر بن حرب ؤ، هغه چي د لښکر په منځ کي يې مرکز ؤ او د لښکر د راسته طرف قومندان خالد بن وليد ؤ چي په دغه وخت کي مشرک ؤ او د لښکر د چپه طرف قومندان عِکرمه بن ابي جهل ؤ او د لښکر پياده قومندان صفوان بن اميه ؤ او د لښکر د غشي ويشتونکو قومندان عبدالله بن ابي ربيعه ؤ، د لښکر د بيرغ مسئوليت د بني عبدالدار وظيفه وه چي دغه منصب و بني عبدالدار ته هغه وخت ور رسېدلى ؤ چي تر قُصَى بن کلاب وروسته د عبد مناف اولادې د قريشو په منځ کي منصبونه او وظيفې سره وېشل، نو په جنګو كي د بيرغ اخستلو وظيفه و بني عبدالدار ته وسپارل سوه او هيچا نه سواى کولاى چي دغه منصب د دوى څخه واخلي، دا کار لکه سقايه او رفاده، يعني: حاجيانو ته اوبه او ډوډۍ ورکول، لکه د کعبې شريفي پوښول او داسي نور کارونه چي وېشل سوي وه، نو د بيرغ اخستل د بني عبدالدار ميراثي وظيفه وه.
ابوسفيان چي د لښکر عمومي قومندان ؤ د دې دپاره چي د دوى احساسات وپاروي ورته و ويل: يا بني عبدالدار! د بدر په ورځ بيرغ ستاسي سره ؤ او موږ ته هغه را پېښ سوه چي را پېښ سوه خلک بيرغ ته ګوري،که بيرغ و لوېدى لښکر مات سو، نو يا به نن د بيرغ پوره ساتنه کوى يا يې موږ ته را پرېږدى چي موږ يې ساتنه وکو.
ابوسفيان په خپل مقصدکي کاميابه سو ځکه بني عبدالدار د ده په خبرو په قهر سوه او ويل موږ خپل بيرغ و تا ته در تسليم کړو؟ ته به و وينې چي د جنګ په وخت کي موږ څه کارونه کوو او واقعاً هم په جنګ کي داسي ثابت ودرېدل چي د خپلي کورنۍ او خپلو پلرو نسل يې ټول ختم کړی يعني: ټول د مرګ تر وخته ثابت ودرېدل او ټول د مسلمانانو د طرفه يو په بل پسي و وژل سوه، چي قصه به يې وروسته واورى.
ان شاءالله نور بیا....
ماخذ: د سرورِ کائنات صلی الله علیه وسلم ژوند
www.taleemulislam.net
