لیکنه: بریالی فیضي / تعلیم الاسلام ویب پاڼه 

صنعتي کېدل د افغانستان د پرمختګ اساسي اړتیا ده 

د افغانستان د پرمختګ په لاره کي یوه مهمه مسئله دا ده، چي دغه هیواد باید صنعتي سي، د صنعت له اړخه باید پر ځان بسیا سي او د نورو هیوادونو له احتیاج څخه خلاص سي. 

د نړۍ هیوادونه ډېر پرمختللي دي، د دوی د پرمختګ راز دا دئ، چي صنعت ئې پرمختللی دئ، د صنعت په برکت ئې خپل خلګ پر کار کړي دي، خپل ځانونه ئې د نورو له احتیاج څخه خلاص کړي دي او د همدې صنعت په برکت ئې خپلو خلګو ته هوسا ژوند برابر کړی دئ. 

افغانستان هم د نورو هیوادونو غوندي اړتیا لري، چي باید د صنعت ودي ته ئې ځانګړې پاملرنه وسي، اوس د جنګ کمبله ټوله سوې ده، د دې له پاره ښه زمینه مساعده ده، چي د هیواد د اقتصادي ځان بسیایني غم وخوړل سي او د صنعت د ودي له پاره د خصوصي سکټور ملاتړ وسي. 

بېله صنعتي انقلاب څخه د افغانستان پرمختګ ناشونی دئ، موږ باید دومره توانايي ولرو، چي د خپلي اړتیا وړ صنعتي توکي په خپل هیواد کي تولید کړو، موږ باید د دې وړتیا ولرو، چي خپل کانونه د خپلو داخلي کمپنیو په مرسته استخراج کړو، ترڅو ګټه ئې یوازي او یوازي افغانانو ته رسېدلې وي. 

که چیري زموږ د هیواد کانونه د بهرنیو کمپنیو له خوا استخراج کیږي، ګټه به ئې ډېره کمه وي، د افغانستان د صنعت او سوداګرۍ سرپرست وزیر نورالدین عزیزي د جولای میاشتي شپږمه په کابل کي د صنعتکارانو یوې غونډي ته په وینا کي وویل، چي هغه بهرنۍ کمپنۍ چي د افغانستان کانونه استخراجوي، یوازي ۷ سلنه ګټه ئې د افغانستان اسلامي امارت ته ورکوي. 

د نوموړي په خبره دغه ګټه ډېره کمه ده، د کانونو څخه هغه وخت موږ پوره پوره ګټه اخیستلی سو، چي زموږ داخلي کمپنۍ دومره ظرفیت ولري، چي دغه معادن استخراج کړي. 

د افغانستان د اقتصادي پرمختګ له پاره د اسلامي امارت ژمنتیا سته او په دې لاره کي د اقتصادي معاونیت له لوري په پرله پسې ډول منظمي هڅي رواني دي، خو د دې سره په څنګ کي د صنعت د ودي په برخه کي که پاملرنه لا زیاته سي، ګټه به ئې ډېره مثبته وي، د خصوصي سکټور ملاتړ د صنعت د ودي په برخه کي لا آسانتیا رامنځته کولای سي. 

بله مهمه خبره د کانونو د استخراج مسئله ده، چي باید تر ډېره حده کوښښ وسي، چي په داخلي کمپنیو کي دومره ظرفیت پیدا کړل سي، چي د کانونو استخراج وکړي، ترڅو د دې ملي شتمنۍ لا ډېره ګټه افغانانو ته رسېدلې وي. 

www.taleemulislam.net