لیکنه: ویس احمد ابراهيم / تعلیم الاسلام ویب پاڼه

د سورة الجاثية لنډه پېژندنه 

سورة الجاثية د مصحف او تلاوت په اعتبار ۴۵ سورة دئ، چي په مکة معظمة کي نازل سوی دئ.

سورة الجاثية ۳۷ آية دئ او ۴ رکوع لري.

د دې سورة نوم د ۲۸ آية څخه اخستل سوی دئ، چي الله تعالی فرمايي: 

وَتَرَىٰ كُلَّ أُمَّةٍ جَاثِيَةً ۚ كُلُّ أُمَّةٍ تُدْعَىٰ إِلَىٰ كِتَابِهَا الْيَوْمَ تُجْزَوْنَ مَا كُنْتُمْ تَعْمَلُونَ.

ژباړه: او ته به (د قيامت په ورځ) ټول امتونه (او ډلي و فرقې) ووينې چي پر ګونډو به ئي (د بيري او خوف له وجي)، ټول امتونه به خپل و کتابونو ته راوغوښتل سي، نن هغه ورځ ده چي تاسو ته به د هغه څه جزا درکول سي چي تاسو کول.

جاثية يعني په ګونډو کېدل.

په سورة الجاثية کي لاندي موضوعات ذکر سوي دي 

۱-  قرآن عظيم الشان د الله تعالی له خوا را استول سوی دئ.

۲-  په آسمانونو او مځکي کي او په ټولو ژوندي موجوداتو کي د الله (رب العزة) نښي نښانې سته.

۳-  افسوس دئ پر درواغ ويونکو ګناهکارانو باندي.

۴-  د الله تعالی په امر سره په اوبو کي کښتۍ روانه وي، تاسو د الله تعالی څخه فضل وغواړئ او شکر ئې اداء کئ. د انسان هر عمل خپله د هغه کس له پاره دئ.

۵-  الله (رب العزة) و بني اسرائيلو ته حکمت، نبوت او کتاب ورکئ، د ښو شيانو رزق ئې ورکئ او په ټوله عالم کي ئې دوی ته فضيلت ورکئ.

۶-  الله تعالی تاسو پيدا کړلاست، بيا به مو مړه کيي، بيا به مو په ورځ د قيامت را جمع کي او هر نفس ته به د کړي اعمالو بدله ورکي او د هيچا سره به ظلم نه کېږي.

۷-  ټول ثناء و صفت او لوړوالۍ يوازي الله (رب العلمين) لره دئ.

په سورة الجاثية کي الله تعالی د بني اسرائيلو قصې ته داسي اشاره کړې ده: يقيناً موږ بني اسرائيلو ته کتاب، نبوت او حکمت ورکړی وو، د پاکو او ښو خورکو رزق مو ورکړی وو او پر ټولو عالميانو مو دوی ته فضلت ورکړی وو.

د الله تعالی اوامر مو ور ته واضح کړي وه، ليکن خپل په منځو کي ئې اختلاف وکئ، نو د دوی په منځ کي به الله تعالی په ورځ د اخرت فيصله وکي.

اوس مو تاسو (يعني د محمد ﷺ امت) ته دغه شريعت درکئ، نو خپل د خواهشاتو پيروي او تابع داري مه کوئ. او الله (رب العزة) د پرهيزکارانو (متقيانو) ملګری او دوست دئ.

او دا (قرآن کريم) د انسانانو له پاره حکمت او بصيرت دئ. بالخصوص د مؤمينانو له پاره هدايت او رحمت دئ.

www.taleemulislam.net