لیکنه: زینب دُورانۍ/ تعلیم الاسلام ویب پاڼه
وژاړه؛ خو یوازي د الله په وړاندي
زیاتره وخت ژړا د دردونو، ذهني ستړیا او فشارونو لپاره ډېره ګټوره وي عینا داسي لکه درمل چي د یو درد په له منځه وړلو کي اساسي رول لري همداسي ژړل هم ځیني وخت ګټور کېدای سي.
دا ډیر تاوان لري چي څوک د خپلو غمونو او مشکلاتو په مقابل کي همېشه مبارزه کوي، زغمي یې او په ځان کي درد پټ ساتي.
ژړا کولو سره د انسان روحیه ډیره قوي کیږي او انسان د نورو مشکلاتو زغملو ته چمتو کیږي او د مخکي څخه ډیر مقاومت کولای سي.
ژړا د هر انسان فطري عمل دئ او د انسان د پیدایښت څخه بیا د عمر تر پای پوري انسان په خپل جسم او ذهن کي په طبیعي ډول د ژړا احساس پالي او دا خبره یې منلي وي چي انسان پر ډیرو شیانو ژړلای سي او ژاړي هم، بعضي وخت قوي قوي انسانان هم ژاړي او دا د انسان کمزوري نه، بلکي د مقاومت د تقویې لپاره یو تخنیک دئ.
اوس سوال دادئ چي انسان باید څه وخت او څنګه وژاړي؟
کله چي انسان د ژوند په مشکلاتو او امتحانونو کي را ګیر سو؟ کله چي نا امیدي او مایوسي په سر واخیستی؟ او کله چي په ځان کي د کمزوري د احساسولو په وخت کي ژړا ورسي نو باید وژاړي. باید ښه ډیر وژاړي؛ خو ....
د میوزیک په اوریدلو، ځان په خونه کي بندي کولو، د شیانو په ماتولو، د ناوړه چلند په کولو، په چیغو چیغو ژړلو، د الله تعالی په ناشکري کولو او داسي نورو بیهوده افعالو باندي ځان هلاکت ته رسوي چي بعضي وخت کفري الفاظ هم ورڅخه ویل کیږي.
ژړا انسان خپل د باطن د ارامولو لپاره کوي او باطن هغه وخت ارامیږي چي پر سنت طریقه برابر اودس وکړي لمونځ ادا کړي او الله تعالی ته په دعا کولو کي وژاړي.
ژړا خو څوک د بنده لپاره نه کوي ځکه بنده خپله خپل مشکلات نه سي حل کولای، هغه چاته وژاړه چي د بنده ګانو خالق دئ، پر هر څه توانا دئ، الله تعالی ته ستا یوه اوښکه ډیره ارزښتناکه ده په داسي حال کي چي نور انسانان د سختي په وخت کي لاس درڅخه اخلي او یوازي دي پریږدي.
پر بالښت د اوښکو تویولو پر ځای پر مصله باندي اوښکي توی کړه، چي هم دي اوښکي بې ارزښته نه سي او هم دي مشکلات د ستر خالق جل جلاله په توسط حل کړل سي.
www.taleemulislam.net
