لیکنه: مولوي قدرت لله ارشاد / تعلیم الاسلام ویب پاڼه

لَوْلَا يَنْهَاهُمُ الرَّبَّانِيُّونَ وَالْأَحْبَارُ عَنْ قَوْلِهِمُ الْإِثْمَ وَأَكْلِهِمُ السُّحْتَ لَبِئْسَ مَا كَانُوا يَصْنَعُونَ. الایة

د المائدې د درویشتم (۶۳)  آیة په تفسیر کي مفسرین لیکي:

هر کله چه متعال خدای جل جلاله یو قوم د هلاکت کندي ته غور ځوي، نو د قوم عوام په ګناهونو او د الله متعال په نافرمانیو کي ډوب شي،

خواص یعني علماء او مشایخ د قوم ګونګي شیطانان وګرځي د خپل عزت او دنیا پرستۍ په خاطر چپه خوله وي حق وینا نه کوي او نه خلګ د ګمراهۍ له کندي ژغوري.

بني اسرائیل ځکه تباه شول چه عوام یې د دنیا په شهواتو او خوندونو، ډم او ډمامو، عیش و عشرت، فحشاء او نڅاوو، کي اخته شول، د الله تعالیٰ عظمت او جلال او د ده قوانین او احکام یې شاته وغورځول.

علماوو او مشایخو یې امر بالمعروف او نهی عن المنکر فریضه  ترکه کړه، ځکه دوی د دنیا په حرص او د شهواتو په اتباع کي تر عوامو زیات ډوب وه. د مخلوق ویري او یا د دنیا طمعي د حق د آواز له اچتولو منعه کړي وه.

د همدې سکوت او مداهنت له وجي پخواني خلګ الله تعالی تباه کړي دي.

نو د همدې لپاره محمدي امت ته په ډیرو نصوصو او احادیثو کي زیات تأکید او تهدید شوی دی چه په هر وخت او د هر سړي په مقابل کي د امر بالمعروف او نهی عن المنکر څخه تغافل او بي پروائې ونه کړي، او سترګي ترې پټي نه کړي. (کابلی تفسیر)

 الله تعالی دي مو د حقاني علماوو پیروي او اتباع په نصیب کړي.