د (نکاح) نورې ليکنې
تازه سرليکونه
بېلابېلې ليکنې
د څلورو میاشتو کم قسم
که څوک د خپلي ښځي د نژدېکت څخه د څلورو میاشتو څخه د کمي مدې لپاره لوړه وکړي د بېلګي په ډول لوړه وکړي چي درې میاشتي به خپلي ښځي ته نه نژدې کیږي ، دا لوړه د ایلاء حکم نه لري که پر خپله لوړه پاته سو طلاق نه واقع کیږي او که قسم يې مات کړى نو د قسم کفاره به ورکوي .
تش په خوله رجوع
ددې د پاره چي طلاق واقع نه سي نو ایلاء کونکی باید د څلورو میاشتو په مده کي دننه د خپلي ښځي سره نژدېکت وکړي ، خو که ایلاء کونکی ناروغ وو او د جماع توان یې نه درلودى ، یا یې ښځه مریضه وه د ناروغۍ لکبله یې نژدېکت نه سواى ورسره کولای همدا راز که څوک په لیري واټن کي پردیس وو د ایلاء په مده کي یې ځان تر خپلي ښځي نسوای رسولای ، بیا تش د خولې په وینا هم رجوع کولای سي .
که د څلورو میاشتو په دننه کي په خوله ووایي : ما خپلي ښځي ته رجوع کړې ده ، د قسم کفاره به ورکوي او ایلاء یې هم له منځ څخه ځي يعني که څلور میاشتي پوره سي طلاق نه واقع کیږي .
که ناروغ په خوله رجوع وکړي او د قسم اخیستلو د نېټې څخه څلور میاشتي لا پوره سوي نه وي ناروغي یي جوړه سي هغه تش د خولې رجوع يې لغو کیږي په عملي بڼه به رجوع ورته کوي .
انتِ علی حرام
که څوک خپلي ښځي ته ووایي : انتِ علی حرام یعني ته پر ما حرامه یې .
دلته د سړي نیت ته کتل کیږي که د یوه طلاق په اراده يې دا وینا ښځي ته کړې وي نو یو طلاق لویږي ، که د درو طلاقو په نیت يې کړې وي درې طلاقه په واقع کیږي .
که دا وینا يې د ظِهَار په نیت کړې وي نو ظِهَار په واقع کیږي دا چي ظِهَار څه ته وايی او څه حکمونه لري دا په راتلونکو پاڼو کي ان شاء الله د ظِهَار په باب کي درته بیانیږي .
خو که د دې وینا څخه یې تحریم یعني حرمت مراد وو بیا د ایلاء حکم لري ، همدا ډول که د هیڅ شي اراده يې نه درلودل همداسي يې دا وینا کړې وه هلته هم دا وینا د ایلاء حکم لري .
که د همدې وینا څخه وروسته د څلورو میاشتو په دننه کي د ښځي سره نژدېکت وکړي د قسم کفاره به ورکوي او که ددې وینا څخه وروسته څلور میاشتي پر تېري سي او د ښځي سره هیڅ نژدېکت و نه کړي نو یو بائن طلاق په لویږي .
ماخذ: فقه المبتدي، دوهم ټوک- نکاح
مؤلف: مولوي محمد عمر خطابي
ورته ليکنې:
تبصره
