سوال:د ماښام لمونځ کول تر څه وخته پوري روا دى او څه مهال قضا کيږي؟

د سوال کوونکي نوم: مطيع الله

ځواب: د ټولو آئمه و په آند د لمر لوېدلو څخه وروسته سمدستي د ماښـام د لمانځه وخت پیل کېږي ځکه چي عمر  رضي الله عنه  د رسول الله  صلی الله علیه وسلم  څخه روایت کوي : إِذَا أَقْبَلَ اللَّيْلُ مِنْ هَا هُنَا وَأَدْبَرَ النَّهَارُ مِنْ هَا هُنَا وَغَرَبَتْ الشَّمْسُ فَقَدْ أَفْطَرَ الصَّائِمُ (بخاري ) وایي،چي تیاره د ختیځ پلو څخه را پورته سي او ورځ د لوېدیځ خوا څخه ټوله سي او لمر ډوب سي نو د روژې د ماتولو وخت پر روژاتي راغلئ یعني ماښام سو او همدا راز د ټولو آئمه و په آند د ماښام د لمانځه د پاره مستحب وخت دا دی چي د ماښام د وخت د داخليدلو څخه وروسته سمدستي د ماښام لمونځ اداء سي .

د ماښام د لمانځه اخري وخت د ټولو ائمه و په آند تر شفق پوري اوږ دېږي یعني تر هغه مهاله چي په غربي افق یعني لوېدیځ پلوکي شفق لیدل کېږي د ماښام لمونځ اداء کېږي البته د ګڼو ستورو د را ښکاره کېدلو تر وخته پوري بېله عذره لکه سفر او داسي نور د ماښام لمونځ ځنډول کراهیت لري .

دا چي شفق څه ته وايي ؟ او زموږ د امامانو په دې اړوند څه دریځونه دي مسئله په پوره تفصیل سره په مخکنۍ ( ٢٤) شماره سوال کي جواب سوه او هلته د ابوحنیفه  رحمة الله عليه رجوع او هم راجح قول ذکر سو، چي شفق و هغي سرې وړانګې ته وایې، چي د شپې په لومړۍ برخه کي د لوېديځ خوا ته ښکاري تر، څو چي دا سره وړانګه لوېدیځ پلو ته وي د ماښام د لمانځه وخت دئ چي دا سره وړانګه ورکه سي د ماخستن د لمانځه وخت پیلیږي .

د تعلیم الاسلام مجلې د دريمي ګڼې څخه