تازه سرليکونه
د شراکت تعریف او ډولونه
  تعلیم الاسلام
  March 13, 2022
  0

 شَرِکَةُ

تعلیم الاسلام ویب پاڼه 
شَرِکَةُ ته په پښتو کي شراکت وايي .
 
شَرِکَةُ په لغت کي اختلاط او ګډېدلو ته وايي يعني يو مال د بل مال سره دا ډول ګډېدل چي بيا نه سره بېليږي ، په فقهي اصطلاح کي يې تعريف په لاندي ډول دى : 
 
د شراکت تعريف : په سر مايه او ګټه کي د شريک کېدلو تړون ته شراکت وايي  . 
 
شراکت پر دوه ډوله دى:
 
(١) شَرِکَةُ الاَملاکِ . 
(٢) شَرِکَةُ العُقُودِ . 
 
شَرِکَةُ الاملاَک
 
شرکة املاک هغه شراکت ته وايي چي دوه يا څو تنه د يوه شي په مُشَاع ډول مالکان وګرځي ، مُشَاع دې ته وايي چي شريکان د شي په هر جزء کي د فيصدۍ له مخي شريکان وګرځي .
 
دلته موږ شَرِکَةُ الاملاکِ د اَملاکي شراکت په نامه يادو .
 
املاکي شراکت کله د شريکانو په خپل خوښه او اختيار را منځ ته کيږي او کله بيا د شريکانو بې اختياره را منځ ته کيږي . 
 
مثال : زيد ، بکر او خالد ته يو باغ د پلار څخه په ميراث کي ورسېږي ، تر هغه مهاله چي دوى خپل منځ کي باغ وېشلى نه وي باغ د دوى درو تر منځ په مُشَاع ډول شريک دى .
 
دا د زيد ، بکر او خالد تر منځ املاکي شراکت دى خو دوى يو د بل سره بې اختياره پکښي شريکان سوي دي . 
 
که زيد ، بکر او خالد په ګډه باغ رانيسي هلته هم باغ د دوى درو تر منځ په مُشَاع ډول مشترک  ګرځي خو دلته دا املاکي شراکت دوى تر منځ د دوى په خوښه او اختيار را منځ ته سوى دى .  
 
اصطلاحات :  
مُشَاع : مُشَاع هغه شي ته وايي چي د څو تنو تر منځ په ګډه د فيصدى په حساب شريک وي . 
 
مُفرَزُ : د شريکانو تر منځ چي مُشَاع شى ووېشل سي او د هر يوه حصه د بل د حصې څخه بېله کړه سي هغه ته مُفرَزُ وايي . 
 
مثال : زيد ، بکر او خالد ته د پلار سراى په ميراث کي پاته سو ، دا سراى د زيد ، بکر او خالد تر منځ په مُشَاع ډول مشترک ګرځي ، دوى درې د سراى په هره خونه ، په هره حصه کي يو د بل شريکان بلل کيږي .
 
 که دوى سراى پخپل منځ کي ووېشي او د هر يوه حصه د نورو څخه بېله او معلومه سي ، دلته د هر يوه برخه د نورو څخه مُفرَزُ يعني بېله سوه نور نو دوى درې يو د بل شريکان نه بلل کيږي بلکي يو د بل ګاونډيان بلل کيږي . 
 
تَمَلُک : د يو شي مالک کېدلو ته تَمَلُک وايي . 
 
تَمَلُيک : بل ته په ځان شى ورکول تَمَلُيک بلل کيږي . 
 
د املاکي شراکت حکم
 
په املاکي شراکت کي هر شريک د بل شريک په حصه کي بېګانه بلل کيږي او يو شريک د بل شريک په برخه کي د هغه بې اجازې هيڅ نوع تصرف نسي کولاى . 
 
مثال : که زيد او بکر په ګډه باغ رانيسي ، نيمى پيسې يې زيد او نيمى يې بکر ورکړي ، باغ د زيد او بکر تر منځ په مُشَاع ډول سم برابر مشترک ګرځي . 
 
په دوى دوو کي هر يو خپله حصه يعني د باغ ٥٠% پنځوسمه سلنه خرڅولاى سي ، خو ټوله باغ د هغه بل بې اجازې نسي خرڅولاى ، ځکه چي په املاکي شراکت کي يو شريک د بل شريک په حصه کي هيڅ ډول تصرف د هغه بې اجازې نسي کولاى .
 
ورپسې لیکنه:  شرکة العقود او د هغه ډولونه 
---------------------------
ماخذ: فقه المبتدي، دریم ټوک- معاملات
مؤلف: مولوي محمد عمر خطابي
www.taleemulislam-radio.com
 
تبصره
يو نوم خامخا وليکئ.دغه نوم تر ٤٠ تورو زيات دى.
برېښناليک خامخا وليکئ.دغه برېښناليک تر ٤٠ تورو زيات دى.دغه برېښناليک باوري نه دى!.
متن خامخا وليکئ.متن تر وروستي بريده رسېدلى دئ.

  که نه لوستل کېږي دلته کليک وکړئ.  

سرته